A alcaldesa, Inés Rey, presidiu esta tarde a recepción institucional ao Real Club Deportivo logo de acadar este domingo o ascenso á máxima categoría do fútbol masculino estatal. O acto celebrouse no Palacio Municipal de María Pita e máis de 15.000 persoas encheron a praza para recibir a xogadores, equipo técnico e directiva do club.

A alcaldesa, que estivo acompañada polo concelleiro de Deportes, Manuel Vázquez, destacou a unión entre equipo e afección como clave do éxito acadado. "Non xogades só cun balón, xogades coa felicidade dunha cidade enteira. Podedes sentirvos orgullosos, pois onte fixestes felices a moitas persoas", sinalou a rexedora. No acto institucional, celebrado no salón de sesións, tamén interviron Juan Carlos Escotet, presidente do Real Club Deportivo, Antonio Hidalgo, adestrador do primeiro equipo, e Diego Villares, capitán.

"Estes oito anos non estivestes sos. Xunto a vós había unha afección orgullosa, á que non lle importaba cambiar o Bernabeu ou o Camp Nou polos pequenos estadios de Primeira RFEF", dixo Inés Rey. A rexedora tamén tivo palabras de lembranza cara Arsenio Iglesias: "O seu espírito estaba onte con todos vós en Valladolid, empurrando cara o obxectivo final". Tras o acto os xogadores saíron ao balcón do Palacio Municipal a saudar á afección que se atopaba na praza.