Melendi volverá a facer tres concertos consecutivos no Coliseum logo do seu éxito no 2023 no mesmo recinto, con tres datas nas que se esgotaron todas as entradas. O éxito de vendas rexistrado para os concertos de Melendi no Coliseum obrigou a ampliar a súa presenza na cidade cunha terceira actuación o vindeiro 12 de novembro, dentro da xira 'Pop Rock Tour'. O anuncio prodúcese despois de que as entradas para o concerto do 14 de novembro se esgotasen e de que as dispoñibles para a cita do 13 de novembro estean xa nas súas últimas unidades. 

Coa incorporación desta nova data, o artista asturiano ofrecerá tres concertos consecutivos no recinto municipal coruñés, consolidando unha vez máis a súa extraordinaria relación co público da cidade. O novo espectáculo contará co mesmo formato e repertorio previstos para as actuacións xa anunciadas. As entradas para o 12 de novembro sairán á venda este venres 7 de agosto ás 12.00 horas a través das canles de venda habituais.

"Que Melendi teña que ampliar a súa xira na Coruña con unha terceira actuación é unha mostra do extraordinario momento que vive a cidade como referente musical do noroeste peninsular", sinalou o concelleiro de Cultura e Turismo, Gonzalo Castro. "Desde o Goberno de Inés Rey levamos anos traballando para atraer grandes xiras nacionais e internacionais, consolidando o Coliseum como unha das principais infraestruturas culturais do país", engadiu. 

Melendi regresará así a un escenario que coñece perfectamente. O artista xa protagonizou unha tripla actuación no Coliseum en novembro de 2023 e, coa nova ampliación de datas, continuará incrementando unha vinculación que o converte nun dos artistas máis exitosos da historia recente do recinto municipal. O concerto do 12 de novembro súmase así á intensa programación do Coliseum, que continúa incorporando grandes artistas e espectáculos ao calendario cultural da cidade.