O Morriña Fest volverá ao porto da Coruña no vindeiro ano 2026. Será os días 24 e 25 de xullo, e cos primeiros artistas desta nova edición xa confirmados: Myke Towers, Juanes, Hard GZ e Belén Aguilera.

A alcaldesa, Inés Rey, apuntou ao festival como "unha das citas máis importantes do calendario estival galego e tamén no conxunto do noroeste de España", subliñando a aposta do Morriña por un cartel que sempre combina grandes estrelas internacionais, artistas consagrados e referentes actuais da escena musical.

Neste sentido, a rexedora puxo en valor a elección do porto da Coruña para a celebración dos concertos, "un emprazamento que está a gañar peso ano tras ano" e que xa está consolidado e identificado como escenario de grandes actuacións e eventos culturais.

Máis de 35.000 persoas asistiron á pasada edición do festival, que contou coa participación de artistas como Nathy Peluso, Ozuna, Recycled J, Mikel Izal, Alleh & Yorghaki, Miss Caffeina, Duncan Dhu, Alcalá Norte e Beéle, entre moitos outros.

Agora, e á agarda de máis confirmacións, os primeiros en sumarse ao cartel do Morriña Fest serán o portorriqueño Myke Towers -que volverá á cidade tras o seu concerto no Coliseum en maio deste ano-; un icono musical a escala mundial como o colombiano Juanes; o artista Hard GZ, convertido nun dos persoeiros máis influíntes da música urbana en España; e a catalana Belén Aguilera, xa asentada como unha das voces máis relevantes do pop alternativo actual.

As entradas de cara ao Morriña Fest 2026 sairán á venda mañá, martes 16 de decembro, ás 12.00 horas, na súa páxina web oficial. Un ano máis, o festival conta co apoio do Concello da Coruña.