O Concello abre mañá, 1 de setembro, o prazo de preinscrición para participar na nova programación de actividades socioculturais da rede de centros cívicos municipais, que se desenvolverá entre os meses de setembro e decembro. A convocatoria ofrece máis de 5.100 prazas distribuídas en 345 grupos e está dirixida a persoas de todas as idades. Esta ampla programación forma parte da política de dinamización cultural e formativa nos barrios desenvolvida polo Goberno de Inés Rey. 

A preinscrición poderá realizarse durante os días 1, 2 e 3 de setembro a través da páxina web municipal. As persoas que non dispoñan de acceso a Internet poderán recibir apoio para realizar o trámite a través do teléfono 857 890 628. A concelleira de Benestar Social, Participación e Igualdade, Nereida Canosa, animou á veciñanza a participar nunha programación "que converte os centros cívicos en espazos de encontro, aprendizaxe e convivencia nos barrios e que permite ofrecer alternativas adaptadas ás distintas idades e intereses da cidadanía".

A oferta desta convocatoria inclúe 40 grupos dirixidos á infancia, 27 para a mocidade, 216 de carácter interxeracional e 62 específicos para persoas maiores. Entre as propostas figuran actividades relacionadas co benestar físico e emocional, a creatividade, a aprendizaxe, as novas tecnoloxías, a cociña, o baile ou a adquisición de hábitos saudables.

Para a infancia inclúense propostas como animación en stop motion, deseño de personaxes manga, inglés, cociña, apoio escolar ou xestión das emocións. A mocidade contará con actividades de reforzo educativo, danza urbana, conversa en inglés ou preparación de menús saudables. Pola súa banda, a programación interxeracional ofrece disciplinas como ioga, pilates, taichí, fotografía, pintura, costura ou informática, mentres que a destinada especificamente ás persoas maiores reforza a estimulación cognitiva, o exercicio adaptado, a prevención de caídas e as competencias dixitais.

Unha vez pechado o prazo de preinscrición, as listaxes provisionais publicaranse o 7 de setembro e o día 8 habilitarase a presentación de reclamacións. O sorteo para a adxudicación das prazas terá lugar o 10 de setembro e as listaxes de admisión e de agarda publicaranse o día 21. A formalización da inscrición e o pagamento das taxas realizaranse os días 22, 23 e 24 de setembro. As actividades comezarán o 28 de setembro, data na que tamén se iniciará a xestión das listaxes de agarda.