O Concello da Coruña vén de abrir a convocatoria do Plan de apoio ás entidades musicais locais de cara a este ano 2026. As bases xa poden ser consultadas na páxina web municipal e a contía destinada ás entidades é de 250.000 euros.

"A nosa alcaldesa, Inés Rey, quere apoiar e impulsar ás asociacións que representan a cultura tradicional e popular, que son unha peza fundamental da programación da cidade", indicou o concelleiro de Cultura e Turismo, Gonzalo Castro. O plan busca contribuír á difusión da oferta musical das entidades sen ánimo de lucro que desenvolven a súa actividade cultural na cidade, cun grao de implementación social representativo e cunha formulación musical e de baile.

"As asociacións que visibilizan a cultura tradicional da Coruña son fundamentais á hora de trazar a nosa identidade. Por iso, o noso obxectivo é poñelas en valor e fomentar a súa presenza na programación anual de eventos culturais na cidade, cunha perspectiva de continuidade", expuxo Castro. Neste sentido, o concelleiro puxo como exemplo a Romaría de Santa Margarida, que se organiza cada ano durante o mes de agosto, ao abeiro das Festas de María Pita.

A este respecto, a dotación prevista polo Concello de cara á convocatoria de axudas deste ano é de 250.000 euros. O prazo para presentar as solicitudes xa está aberto e haberá un total de quince días naturais para que as asociacións e entidades interesadas presenten a súa documentación.

As solicitudes poderán presentarse, preferentemente, por vía telemática. Será a través da sede electrónica, dirixindo a solicitude ao Instituto Municipal Coruña Espectáculos (IMCE). Admitiranse tamén solicitudes presenciais no Rexistro administrativo do IMCE (avenida da Marina, 18), previa cita no teléfono 981 184 233.