O Concello publicou onte a listaxe definitiva de admitidos e admitidas nas Escolas Infantís Municipais (EIM), con 308 prazas adxudicadas, do total de vacantes, que ascende este ano a 412 (120 para o curso de 0-1 anos, 134 para o curso de 1-2 anos e 158 para o curso 2-3 anos). 

"A rede de Escolas Municipais Infantís está a beneficiarse dun moi necesario impulso grazas á acción decidida do Goberno de Inés Rey, aumentando as prazas dispoñibles e mellorando as instalacións, como é o caso da escola de Monte Alto, que abrirá as súas portas en setembro para o curso que vén cunhas intalacións novas e modernizadas", apuntou o concelleiro de Educación, Formación e Innovación Tecnolóxica, Juan Ignacio Borrego.

As familias admitidas no seu centro de preferencia poderán completar a matrícula a partir de hoxe, 1 de xullo, e ata o próximo día 10. Aos solicitantes que quedaron en listaxe de agarda por non houber prazas dispoñibles na escola pedida, se lles poderá ofrecer, ao finalizar o prazo de primeiras matriculacións, vacantes noutros centros da rede municipal. En casos excepcionais e debidamente xustificados, permitirase presentar solicitudes fóra do prazo estipulado.

"Cabe lembrar que este ano, de novo, as Escolas Municipais Infantís serán totalmente gratuítas paras as familias, grazas á modificación da ordenanza impulsada por Inés Rey no pasado mandato, que fixo realidade o acceso verdaderamente universal a un servizo público fundamental, sendo ademais o Concello pioneiro en Galicia en facelo", engadiu Juan Ignacio Borrego. 

 Lista de agarda única 

A principal novidade das bases de admisión nas EIM deste ano é a supresión das convocatorias extraordinarias. A partir deste curso, o Concello xestionará ata finais de ano unha listaxe de agarda única para o conxunto da rede das EIM, o que facilitará a oferta de prazas nas escolas a medida que queden dispoñibles e axilizará así o acceso directo ás familias demandantes, sempre que haxa vacantes nalgunha das oito escolas. Isto supón un cambio substancial na forma de proceder neste sentido, xa que, ata agora, a listaxe de agarda era por escola infantil.

Ademais, no caso de circunstancias excepcionais que xurdan durante o curso escolar, coma un traslado á cidade da Coruña pola metade do curso ou outras circunstancias debidamente xustificadas, poderase obter praza nunha escola infantil se existe vacante e non hai listaxe de agarda. Isto, sen necesidade de que se realice unha convocatoria extraordinaria ou sen que se participase na ordinaria.

O Concello xestiona, a través das respectivas empresas concesionarias, oito escolas infantís: Arela (Elviña), Carricanta (O Castrillón), Os Cativos (Palavea), Agra do Orzán, Os Rosales, A Caracola (Novo Mesoiro), a Luís Seoane e a EIM de Monte Alto.