O Concello da Coruña apoia, un ano máis, a celebración do Día das Peñas do Deportivo, unha xornada con diferentes actividades na rúa Almirante Cadarso, na contorna do estadio municipal de Riazor. Este evento celebrarase o sábado 17 de maio a partir das 12.00 horas, coincidindo co encontro que disputarán o Real Club Deportivo e o Granada ás 16.15 horas. 

"Desde o Goberno de Inés Rey seguimos apoiando as grandes celebracións do deportivismo, como faremos tamén coas actividades conmemorativas do 25 aniversario da Liga", indicou Gonzalo Castro, concelleiro de Cultura e Turismo. Como cada ano, haberá actuacións musicais durante toda a xornada, contando este sábado coas bandas Mr. Kamándula, Clandestinos, Tregua e The Muppets. 

Ademais, tamén haberá diferentes propostas gastronómicas durante toda a xornada. Neste evento, organizado pola Federación de Peñas Deportivistas co apoio do Concello, tamén se exhibirá a copa da Liga gañada polo Dépor para que as persoas afeccionadas que o desexen poidan fotografarse xunto a ela, de 12.00 a 14.30 horas.