A alcaldesa da Coruña, Inés Rey, recibiu hoxe no pazo de María Pita ao músico e produtor Raül Refree, que se instalará uns días na cidade para iniciar un proxecto de investigación sobre a música tradicional galega que conta co apoio do Concello. Refree, produtor musical de gran prestixio -lanzou ao éxito a carreira de Rosalía e traballou con artistas como Mala Rodríguez, Silvia Pérez Cruz ou Christina Rosenvinge- permanecerá unha semana na cidade, onde manterá reunións con varias persoas referentes da música tradicional galega para coñecela en profundidade e estudar as súas posibilidades creativas.

Algúns deses encontros celebraranse en dependencias municipais, como o Aquarium Finisterre ou o Castelo de Santo Antón. "O Concello vai estar alí onde se poña en valor a cultura galega e as/os artistas da cidade", sinalou a alcaldesa, tamén responsable directa da área de Cultura. "Xuntar a Raül Refree con músicos tradicionais da Coruña supón abrir unha porta á innovación e á investigación na música galega, así como a súa visibilidade. Son conceptos que encaixan perfectamente dentro das nosas políticas culturais, que tamén queremos que poñan o foco no apoio aos procesos creativos", engadiu Inés Rey, que valorou positivamente "o regreso da actividade cultural segura, como a que se volve desenvolver nos teatros e nos museos municipais e que esperamos poida seguir crecendo así como o permitan as normas sanitarias".