A alcaldesa, Inés Rey, supervisou este mércores o avance das obras do novo parque infantil do Ventorrillo, onde xa comeza a tomar forma o que será o primeiro parque cuberto da cidade. Os traballos permitiron instalar xa as dúas primeiras estruturas metálicas que sosterán o conxunto das catro cubertas e está a instalarse a terceira. Trátase dun elemento innovador que converterá esta área infantil nun equipamento pioneiro na Coruña. Na súa visita, a alcaldesa estivo acompañada polo concelleiro de Infraestruturas, Jesús Javier Celemín Santos, e a concelleira de Benestar Social, Participación e Igualdade, Nereida Canosa.

Nas vindeiras semanas continuará a colocación da última estrutura metálica e, nunha fase posterior, instalaranse as planchas de policarbonato que conformarán a cuberta definitiva. Esta permitirá que as crianzas poidan facer uso do parque durante todo o ano, protexidas tanto da choiva como da radiación solar.

A alcaldesa, Inés Rey, destacou que "esta actuación representa un paso máis no compromiso do Goberno municipal por dotar todos os barrios de espazos públicos de maior calidade, accesibles e adaptados ás necesidades da veciñanza". A rexedora lembrou que "o parque do Ventorrillo será un equipamento pioneiro na cidade e responde a unha forma de planificar os espazos públicos pensando no seu uso durante todo o ano". A intervención forma parte do Plan de Barrios 2025-2027, impulsado polo Goberno de Inés Rey co obxectivo de seguir modernizando os espazos públicos da cidade. Para facer posible a instalación da cuberta retiráronse xa os xogos e o pavimento existentes para posteriormente realizar as cimentacións para as estructuras. Actualmente están executándose os traballos de ancoraxe das estruturas metálicas. Unha vez rematada esta fase, abordarase a renovación integral da área infantil.

O proxecto, que supón un investimento municipal dun millón de euros, permitirá ampliar a superficie do parque dos 400 metros cadrados actuais ata os 730, incrementando tamén a súa capacidade de 76 a 135 persoas usuarias. Ademais da cuberta, renovarase completamente o pavimento e os elementos de xogo, incorporando novos equipamentos inclusivos e sensoriais, así como dous grandes tobogáns aproveitando o noiro lindeiro ao parque, nun deseño similar aos existentes no corredor verde de Novo Mesoiro.