O Concello da Coruña aprobou esta mañá en Xunta de Goberno Local o proxecto de ordenanza fiscal reguladora das contribucións especiais, que permitirá acometer diferentes melloras no servizo municipal de Bombeiros. "Desde o Goberno de Inés Rey atendemos as demandas deste servizo, comprometéndonos a modernizar os seus equipos e dotalos de novos espazos e actualizar os actuais", indicou José Manuel Lage, concelleiro de Economía e Planificación Estratéxica.

Entre as melloras do servizo de Emerxencias atópase a adquisición por un valor de 700.000 euros dun novo posto de mando móbil para a xestión de emerxencias e grandes eventos. Isto permitirá dispoñer da última tecnoloxía para eventos organizados polo Concello, como é o caso do San Xoán. O equipamento que se adquirirá mellorará o actual dispositivo que se sitúa na coiraza e que permite controlar en tempo real as praias, o que garante a seguridade de máis de 150.000 persoas cada ano.

Outro dos investimentos que se destinarán ao servizo de Bombeiros será a ampliación do edificio do parque de Agrela para a reubicación dos servizos administrativos. Dito proxecto suporá un investimento de máis de 470.000 euros. Ademais, adaptarase o parque móbil ás novas ferramentas conforme á normativa vixente por 75.000 euros e levaranse a cabo melloras no parque por máis de 280.000 euros. En total, o Concello investirá 1.377.963 euros no servizo de Bombeiros a través desta ordenanza fiscal.

O Concello establece a imposición e ordenación de contribucións especiais ás compañías aseguradoras que operan na cidade, xa que a ampliación de dito servizo por parte da administración municipal beneficia especialmente ás compañías aseguradoras. Dita recadación destínase anualmente a melloras do servizo de Bombeiros.

Ordenanzas fiscais

Por outra banda, na XGL celebrada esta mañá e que estivo presidida pola alcaldesa, Inés Rey, tamén se aprobou a modificación das ordenanzas fiscais número 16, 43 e 45, que regulan a taxa pola prestación de servizos nos Museos e outras instalacións culturais da cidade. Modifícanse as tarifas vixentes con redondeos á baixa para facilitar o aboamento e a xestión da recadación.

Por último, tamén se modificou a ordenanza fiscal que regula o Servizo de Axuda no Fogar. Trátase da actualización dos baremos de tarifas establecidos pola Xunta, que esta obriga a repercutir aos usuarios.

O voceiro do Goberno local, José Manuel Lage, recordou que estas actualizacións das ordenanzas responden á intención do executivo de Inés Rey de conxelar as taxas e tributos para o ano 2026, tal e como el mesmo anunciara no pleno de outubro e na liña tamén da negociación establecida co BNG para avanzar no marco normativo local.