O Concello da Coruña celebrará este xoves, 22 de maio, unha xornada de portas abertas para presentar á cidadanía o novo TEU do Birloque, situado no recentemente inaugurado Centro Veciñal do barrio (avda. de Glasgow, 5). O equipamento permanecerá aberto ao público de 12:00 a 14:00 e de 17:00 a 20:00 horas, cun programa que inclúe agasallos e actividades infantís para que as familias coñezan de primeira man as posibilidades do espazo.

O TEU do Birloque convértese no quinto local da rede municipal de espazos TEU -xunto ao Faro de Oza, os dous locais da rúa Ribeira Sacra en Novo Mesoiro e o TEU Azahar no barrio das Flores-, un servizo gratuíto que permite á veciñanza reservar locais para celebracións familiares, obradoiros, reunións ou actividades asociativas puntuais. O novo equipamento dispón dun aforo máximo de 30 persoas.

Desde o día seguinte á xornada de portas abertas, as reservas realizaranse a través da aplicación de cita previa (https://citaprevia.coruna.gal/) ou no teléfono de atención cidadá 010, que posibilita solicitar datas cun mínimo de 15 e un máximo de 60 días de antelación, evitando desprazamentos e axilizando o trámite. Para garantir o acceso de toda a veciñanza, cada persoa poderá facer uso destes espazos un día ao mes e até 12 días ao ano. 

Os únicos requisitos para empregar o TEU son ser maior de idade e estar empadroado ou empadroada no Concello da Coruña. O servizo municipal de Participación Cidadá ofrece asistencia telefónica no 010 e atención presencial de luns a venres, de 09:00 a 14:00 horas, para resolver dúbidas sobre o procedemento de reserva. 

Nereida Canosa, concelleira de Benestar Social, Participación e Igualdade, subliña que "coa incorporación deste novo equipamento reforzamos a igualdade de oportunidades nos barrios, poñendo ao dispor da veciñanza un recurso versátil e de balde para celebrar, aprender e compartir". Tamén destacan que as melloras introducidas no sistema de xestión "fan máis sinxelo e transparente o acceso da cidadanía aos locais". A apertura do novo TEU enmárcase dentro das políticas de mellora e ampliación dos servizos públicos que está a poñer en marcha o Goberno de Inés Rey. 

A información completa sobre normativa e condicións de uso pode consultarse na web municipal de Participación ciudadana , onde tamén se atopa unha guía paso a paso para realizar as reservas a través da cita previa en liña.