O Concello da Coruña acolleu este xoves no Salón de Sesións do Pazo de María Pita o acto institucional conmemorativo do 130 aniversario da creación do Colexio Médico-Farmacéutico da Coruña, unha efeméride que pon en valor a traxectoria dun colectivo fundamental na historia da cidade e do sistema sanitario galego.

A alcaldesa da Coruña, Inés Rey, puxo en valor a contribución histórica da entidade como espazo de representación profesional e compromiso coa sociedade. A rexedora asegurou que o colexio "leva 130 anos exercendo un labor constante e imprescindible, representando unha maneira de entender a sanidade baseada na ética, no coidado e na defensa do ben común".

No acto participaron tamén os presidentes dos colexios oficiais de Médicos e Farmacéuticos da provincia, Luciano Vidán e Sara Catrain, así como representantes das Reais Academias Galega, de Medicina e de Farmacia. A sesión incluíu unha conferencia do historiador Carlos González Guitián, centrada na figura de Ramón Pérez Costales, impulsor e primeiro presidente da entidade, e figura clave no desenvolvemento sanitario e cultural da Coruña do século XIX.