Este xoves tivo lugar no Real Club Náutico da Coruña a presentación oficial do Campionato de España de Windsurfer, que se realizará por vez primeira na cidade, entre os días 1 e 3 de maio, e que congregará a máis de 60 regatistas nacionais e internacionais (con participantes de Francia, Italia, Portugal e Australia). 

O concelleiro de Deportes, Manuel Vázquez, acudiu ao acto en representación da alcaldesa, Inés Rey, e celebrou o novo abanico de posibilidades que esta cita abre para a cidade. "O windsurf é un deporte en alza que supón un atractivo crecente para as zonas costeiras. Unha vez máis, demostramos que A Coruña está aberta ao mundo e que ten moitísimo para ofrecerlles a este tipo de encontros internacionais de primeiro nivel", subliñou Vázquez. 

A competición estará composta por un total de nove probas, incluirá unha de longa distancia que percorrerá a totalidade da ría, e estruturarase en dous campos de regata, un deles situado na zona de Bastiagueiro para as probas curtas, o que lle permitirá á cidadanía seguilo desde terra.

"Ademais do prestixio e da proxección, estes eventos ofrécenlle ao público xeral entretementos alternativos e serven para dar a coñecer disciplinas diferentes e miradas renovadoras e dinámicas no deporte. Por iso os coruñeses e coruñesas os recibimos sempre cos brazos abertos", engadiu o concelleiro. 

O Real Club Náutico da Coruña terá unha ampla representación no torneo, con ata sete regatistas locais competindo. Ademais, a cita contará con algúns e algunhas dos deportistas máis destacados desta disciplina, como o actual campión nacional, Joan Roig, ou Pilar Prieto e Eduardo Navarro, entre outros. O domingo 3 de maio, terá lugar a entrega de medallas, que será o colofón dun dos eventos de windsurf de maior alcance nacional.