O concelleiro de Cultura e Turismo, Gonzalo Castro, presidiu esta tarde o acto de presentación das partituras dos motetes de Marcial del Adalid, que tivo lugar na Real Academia Galega de Belas Artes. Esta iniciativa do Concello e do Instituto José Cornide de Estudios Coruñeses ten como obxectivo a recuperación e exaltación do patrimonio musical da cidade, dándoo a coñecer á cidadanía a través da publicación presentada hoxe.

"A cultura dunha cidade como a nosa non se sostén unicamente sobre a novidade. Sostense tamén sobre a capacidade de coidar a súa memoria, de estudar os seus arquivos e de reactivar o seu legado para as novas xeracións, algo que estamos a facer desde o Goberno de Inés Rey", destacou Gonzalo Castro. Marcial del Adalid naceu na Coruña en 1826. Co gallo do seu bicentenario neste 2026, o Instituto José Cornide súmase á conmemoración desta efeméride cun acto que pon en valor a súa produción sacra.

Os seus motetes son fundamentais para comprender a música relixiosa galega do XIX. Fronte á complexidade doutras das súas obras, estas pezas destacan pola súa brevidade, estrutura pechada e un carácter marcadamente homofónico, o que lles confire unha beleza directa e profunda. No acto desta tarde, solistas do Orfeón Terra A Nosa interpretaron unha selección destas obras ao piano.