O Concello da Coruña celebrou esta mañá no Salón de Sesións de María Pita o acto de recoñecemento ao alumnado que acadou as mellores cualificacións na Proba de Acceso á Universidade (PAU) 2025.

A recepción estivo presidida pola alcaldesa, Inés Rey, quen estivo acompañada pola coordinadora de Maestrados e representante da UDC na CIUG, Elisa Beceiro. No acto participou tamén o concelleiro de Educación, Juan Ignacio Borrego.

Durante o evento, a alcaldesa destacou que "estes expedientes falan de traballo constante, de superación e de compromiso cun futuro que xa está a comezar", e subliñou que "a cidade da Coruña está orgullosa dunha xeración que responde con talento e esforzo aos novos retos educativos". A rexedora agradeceu tamén o papel das familias e do profesorado, "pezas fundamentais para acadar estes resultados".

Foron distinguidos/as 16 estudantes coruñeses polos seus expedientes académicos:

• Pedro Peteiro Vázquez, do CPR Liceo La Paz
• Óscar Hermida Rodríguez, do IES Eusebio da Guarda
• Marco Miguélez García, do IES Rafael Puga
• Celia Deus Padín, do CPR Calasanz
• María Penabad Ferro, do IES Adormideras-Sardiñeira
• Miguel Antonio Garaboa Fernández, do CPR Cristo Rey
  • Recolleu o diploma a súa nai, Pilar Fernández Fernández
• Lucas Eiroa Osoro, do IES Monelos
  • Recolleu a súa profesora, Paula Pazos
• Blanca López Crespo, do CPR Eirís
  • Recolleu a súa prima, Inés Bonet Crespo
• Amalia García Blanco, do IES Monelos
• Sara Ramos Díaz, do CPR Obradoiro
• Antía del Corro Rodríguez, do IES Eusebio da Guarda
  • Recolleu o seu amigo, Lucas Piñeiro Parra
• Carmen Abella Rodríguez, do CPR Santa María del Mar
• Claudia Díaz López, do IES Eusebio da Guarda
• Pablo González Faginas, do CPR Obradoiro
  • Recolleu a súa nai, Sandra Faginas
• Javier Serantes Álvarez, do IES Eusebio da Guarda
• Cristina Paz Pérez, do IES Monelos

Inés Rey animou o alumnado a continuar formándose, lembrando que "A Coruña será sempre unha cidade aberta ao talento, á ciencia, á creatividade e ao coñecemento" e sinalou que "queremos que sigades medrando, pero tamén que saibades que aquí hai oportunidades e futuro".

A convocatoria da PAU 2025 contou con 2.722 estudantes examinados/as nas seis sedes da Universidade da Coruña na cidade. Máis da metade dos centros educativos da Coruña acadaron o 100% de aprobados na fase xeral, o que reflicte o alto nivel académico do alumnado e o compromiso dos equipos docentes.