O concelleiro de Mobilidade Sostible, Daniel Díaz Grandío, salientou esta mañá "a normalidade" coa que discorre a primeira xornada de aplicación do novo marco tarifario no transporte público urbano, impulsado polo goberno local. O edil, que esta mesma mañá puido falar cos responsables da concesión municipal, constatou que "a implantación discorre con normalidade, se ben é certo que está a xerar moitas consultas". A este respecto, Díaz Grandío recordou que as veciñas e veciños que teñan algún tipo de dúbida poden dirixirse, ademais de as oficinas do rexistro e as habilitadas na propia estación de autobuses, ao teléfono de información municipal, o 010.

O titular de Mobilidade Sostible recorda que entre as principais novidades da rebaixa tarifaria salienta a creación dun novo perfil gratuíto para menores de 13 anos. Tal e como indicou no día de onte, os e as menores desta idade que xa conten coa tarxeta Millennium poderán acollerse a este novo perfil de forma presencial nos rexistros municipais ou ben, de forma telemática, a través dos caxeiros de Abanca onde xa se recarga a tarxeta. Se, pola contra, non se conta cunha tarxeta e o que se precisa é expedir unha nova, os e as usuarias poderán acudir a oficina de rexistro do Ágora ou, preferiblemente, ao espazo habilitado a tal efecto na estación de Autobuses que, a partir de mañá, ofrecerá a posibilidade de realizar este trámite en horario de tarde, entre as 16.00 a 19.00 horas, de luns a venres.

Con todo, Grandío aclara que, como até o de agora, os e as menores de catro anos poderán acceder ao autobús de forma gratuíta e sen tarxeta. No caso de que o neno ou nena de entre 4 e 13 anos non tivese até o de agora a tarxeta Millennium e quixese solicitala nos espazos antes indicados, debe cumprir cunha serie de requisitos como é estar (tanto el como os membros da unidade familiar á que pertence) empadroados na cidade. Á hora de solicitar a tarxeta, a persoa  usuaria debe presentar tanto o seu DNI, no caso de telo, así como o dun dos seus proxenitores ou titores legais. A tarxeta terá unha validez indefinida a partir do momento da súa condición e até que o titular cumpra os 13 anos sempre que se manteña empadroado na Coruña. A tarxeta é persoal e intransferible.

Ademais do caso particular da gratuidade para os e as menores de 13 anos, Díaz Grandío recordou outras das novidades do novo marco tarifario. O pago en metálico do billete xeral do bus urbano pasa de 1,30 euros a 1,20 euros. En canto á tarxeta Millennium, o billete xeral queda establecido en 0,75 euros (antes 0,85 euros), mentres que o social queda establecido en 0,23 euros (até o de hoxe 0,33 euros).

Pola súa banda, a tarifa plana de carácter xeral queda establecida de forma que se a persoa usuaria fai máis de 44 viaxes ao mes só pagará un máximo de 33 euros. O importe das viaxes a partir da número 45 será reembolsada o mes seguinte. No caso da tarifa plana social, a viaxeira pagará un máximo de 16,10 euros ao mes se fai máis de 70 viaxes. O importe dos traxectos a partir do número 71, como no anterior caso, será reembolsada no mes seguinte.

Ademais, todos os transbordos pasan a ser gratuítos cun tempo máximo de 45 minutos, de forma que se poden facer varias viaxes co prezo dun único billete.