O vindeiro luns, o Concello porá en marcha os traballos de renovación dos puntos de iluminación existentes ao longo do Paseo Serpent, un percorrido peonil que arrodea o barrio de Durmideiras entre a serea de San Amaro e o paseo dos Menhires, e que é moi transitado a diario.

As tarefas consistirán na retirada dos antigos apliques encaixados no muro do paseo, e a posterior instalación de novas luminarias led de última xeración e alto rendemento. O obxectivo, tal e como explicou a concelleira de Infraestruturas e Mobilidade, Noemí Díaz, "é mellorar e reforzar a seguridade das persoas viandantes" nun trazado que, tal e como reflicten os informes municipais, conta cada vez cun fluxo peonil máis notable.

Pola proximidade do Club do Mar de San Amaro, dos camiños do ENIL da Torre e o propio faro, así como das praias e calas lindeiras ao barrio, polo Paseo Serpent pasan a diario moitas veciñas e veciños, tamén turistas e visitantes que bordean a zona. Con esta actuación, o Concello busca dar resposta ás demandas veciñais plantexadas nos encontros informativos do Plan de Barrios, solventando ás necesidades detectadas no percorrido e reforzando a súa visibilidade de noite, xa que actualmente carece de iluminación nocturna.

A concelleira indicou que as actuacións previstas na rede de iluminación do Paseo Serpent inclúen que as novas luminarias, máis modernas, contribúan a minimizar a contaminación luminosa e reducir o seu impacto no medio ambiente.