O Concello comezará nos próximos días o proxecto de prolongación de beirarrúas e colocación dun novo paso peonil na rúa Carré Alvarellos, no barrio de Eirís. A actuación, cun investimento duns 25.000 euros e un prazo de finalización de aproximadamente un mes, responde a unha necesidade de mellora da accesibilidade da que deu conta a propia veciñanza. 

Esta obra forma parte da ampla programación de mantemento, conservación e reparación de beirarrúas e áreas peonís, coa que o Goberno de Inés Rey está a modernizar as rúas e calzadas da cidade, un proceso no que ten unha grande importancia a escoita ás peticións veciñais e que avanza cara a un modelo de mobilidade máis sostible e con máis protagonismo para as peoas e peóns. 

"Non hai actuacións pequenas. O Concello ten o deber de estar pegado a cada rúa, a cada beirarrúa. Este tipo de intervencións supoñen unha mellora substancial para a veciñanza do barrio. A accesibilidade é unha parte fundamental do noso traballo, e por iso estamos a mellorar o ordenamento e os equipamentos barrio a barrio", subliñou Jesús Celemín, concelleiro de Infraestruturas. 

A obra traerá ao tramo central da rúa un novo paso peonil elevado, que, ademais de facilitar o tránsito, contribuirá a que os vehículos minoren a velocidade. Este cruzamento súmase aos dous xa existentes na contorna, que se manterán no mesmo punto. Ademais, colocarase un novo tramo de beirarrúa, co que se ampliará deste xeito o percorrido peonil e a comunicación entre ambos os lados da estrada.