O Concello da Coruña organiza esta semana unha serie de sesións informativas en distintos institutos da cidade, co fin de lles trasladar ás e aos escolares a importancia de respectar a contorna urbana e evitar as pintadas vandálicas que o degradan. Nesta edición, sumáronse sete institutos da cidade: IES Eusebio da Guarda, IES Monelos, IES Puga Ramón, IES Elviña, IES A Sardiñeira, IES Agra do Orzán e IES Fernando Wirtz.

"Desde a creación da Oficina Virtual do Grafiti (OVG) en 2021, compaxinamos as tarefas de limpeza e retirada de pintadas vandálicas na cidade cun importante labor educativo nos centros escolares", explicou hoxe a concelleira de Medio Ambiente, Yoya Neira. "A experiencia adquirida indícanos que a idade para iniciarse neste vandalismo urbano sitúase entre os 12 e os 14 anos, nun momento en que estes mozos e mozas teñen unha maior sensación de impunidade debido á súa idade", precisou. A posta en marcha de plans específicos de limpeza de pintadas foi unha das medidas postas en marcha na cidade pola alcaldesa, Inés Rey, durante o pasado mandato. 

Nas charlas, impartidas por expertos da OVG e axentes da Patrulla Verde da Policía Local, explícaselles ás persoas asistentes os métodos que se empregan para localizar ás persoas autoras das pintadas, a través de grafólogos e vixilancia das zonas nas que actúan os grafiteros ilegais, e expóñense as sancións que terán que afrontar en caso de sexan localizados. Desde que o Concello comezou a súa loita contra este tipo de vandalismo, os expertos grafólogos identificaron os autores e autoras de máis de 15.000 pintadas e sancionouse a 40 grafiteros ilegais.

"É moi importante transmitir a importancia do respecto á contorna urbana, pero tamén que os mozos e mozas saiban as sancións ás que se expoñen, que terán que pagar os seus pais, nais ou titores/as, e as consecuencias que pode ter contar con este tipo de antecedentes", subliñou Neira.

O Concello inviste 150.000 euros anuais no servizo integral para combater as pintadas e grafitis non autorizados. O ano pasado, a Oficina Virtual do Grafiti realizou un total de 2.138 intervencións para retirar pintadas de distintos barrios da Coruña. Cada intervención implica a limpeza dunha media de 3 a 4 pintadas de diferentes características e dimensións por actuación.

No que vai de ano, realizáronse xa 793 intervencións. Desde a posta en marcha deste servizo, realizáronse 10.239 intervencións, o que supón máis de 40.000 pintadas retiradas.

A OVG traballa cunha planificación por distritos que se iniciou na zona centro e que se estendeu de forma homoxénea polos distritos 10, 9 e 8, sen prexuízo de que se acometeran limpezas noutras zonas estratéxicas (rolda de Nelle, rolda de Outeiro, Os Rosales...).

As pintadas con mensaxes que inciten á violencia, ao odio ou aos dereitos fundamentais (igualdade, dignidade, liberdade...) retíranse de forma inmediata en canto son detectadas.

Ademais, realízase un importante traballo de consolidación das zonas xa limpas para evitar a nova aparición de pintadas nesas zonas. Dúas brigadas traballan de luns a domingo e coordínanse para consolidar a zona recuperada e, á vez, ir avanzando na limpeza.