O Concello da Coruña presentou esta mañá en María Pita as indicacións que facilitarán a visibilidade da eclipse total de Sol do vindeiro 12 de agosto, apoiadas en dous visores interactivos que lle permitirán á cidadanía orientarse e escoller con antelación os mellores puntos de observación. 

O responsable dos Museos Científicos Coruñeses, Marcos Pérez Maldonado, explicou a importancia de que todas as persoas interesadas en contemplaren a eclipse o 12 de agosto aproveiten este semana o xemelgo solar que se producirá: na tarde do día 29 de deste mes o sol estará exactamente na mesma posición que o 12 de agosto. Iso permite, indicou, que cada persoa comprobe na contorna máis próxima ao seu domicilio o mellor punto para contemplar o fenómeno e evitar desprazamentos a outras zonas da cidade que seguramente ese día estarán moi saturadas. 

Para axudar na tarefa de busca o Concello desenvolveu dous mapas interactivos de uso público, deseñados polo técnico de Mobilidade José Ancosmede, que permiten comprobar as zonas de sombra e mesmo o punto exacto no que se situará o sol ese día no momento da eclipse. 

Os mapas recollen ducias de puntos distribuídos por toda a cidade, así como zonas nas que a visibilidade pode estar limitada e espazos de estacionamento próximos. Trátase de ferramentas dinámicas e en constante actualización que permitirán adaptar a planificación a medida que se achegue a data do evento. Facilitan ademais, destacou Marcos Pérez, que todas as persoas teñan acceso ás vistas privilexiadas do fenómeno desde calquera dos barrios da cidade. 

A alcaldesa da Coruña, Inés Rey, subliñou a relevancia deste acontecemento astronómico e destacou o traballo previo desenvolvido polo Concello, sinalando que "en ningunha cidade de España se poderá desfrutar dun espectáculo único como a eclipse total de Sol do 12 de agosto como na Coruña, polo que queremos que ese día sexa inesquecible para toda a cidadanía e tamén para as miles de persoas que nos visiten".

Rey incidiu na necesidade de anticiparse ante a elevada afluencia prevista, sinalando que "estamos a preparar un operativo con centos de profesionais implicados e distintos puntos da cidade para dar resposta á chegada masiva de visitantes, tras meses de planificación nos que tamén se definiu un plan de tráfico específico para evitar incidencias".

Neste sentido, a alcaldesa explicou que o obxectivo dos visores é facilitar que a cidadanía poida gozar da eclipse preto das súas vivendas, evitando desprazamentos innecesarios: "Queremos que calquera veciño ou veciña poida chegar camiñando a un punto próximo e vivir esta experiencia con comodidade e seguridade".

Ademais, Rey recomendou aproveitar estes días previos para comprobar as condicións reais de visibilidade: "É importante utilizar o chamado 'xemelgo solar' desta semana, xa que o Sol estará na mesma posición que o día da eclipse. Isto permitirá verificar desde cada punto a visibilidade á hora exacta".

Os visores presentados hoxe son accesibles a través das seguintes ligazóns:

Mapa de sombras:

• https://ide.coruna.gal/portal/apps/instant/interactivelegend/index.html?appid=1f9fc1bc1d2349a29e8bb0f671255407

Visor de puntos de observación:

• https://ide.coruna.gal/portal/apps/instant/attachmentviewer/index.html?appid=4288c97437c34b468809494657e61b21

O Concello leva meses desenvolvendo accións no marco da campaña ACoruñaCidadEclipse, co obxectivo de preparar á cidadanía para este evento. Entre elas, destacan os talleres organizados na Casa das Ciencias en colaboración coa Agrupación Astronómica Ío, dirixidos a profesorado, persoal técnico e profesionais da atención sociocultural, co fin de facilitar a transmisión de coñecementos sobre a observación segura da eclipse.

Estas iniciativas formativas compleméntanse co desenvolvemento de ferramentas dixitais como os visores presentados hoxe, que buscan garantir que toda a cidadanía poida desfrutar deste fenómeno astronómico con seguridade e nas mellores condicións.

O Concello lembra, ademais, a importancia de empregar sempre lentes homologadas para a observación de eclipses ou construír caixas estenopeicas que garantan a seguridade visual dos menores. Ditas caixas pódense facer sen custo e o Concello tamén ofrece información sobre como facelas a través das redes sociais dos propios Museos Científicos.