O Concello, a través da Concellería de Medio Ambiente, comezou hoxe os traballos de reparación da duna de Riazor, afectada polas borrascas de xaneiro e en especial polo paso de Ingrid a pasada fin de semana. Unha retroescavadora de 30 toneladas traballa en Riazor para volver montar e perfilar a duna aproveitando o paso de alerta vermella a amarela.

"Está previsto que os traballos de reparación da estrutura de area que protexe o paseo marítimo estean finalizados esta mesma semana, en función das condicións meteorolóxicas. No Goberno de Inés Rey é unha prioridade manter a seguridade no paseo", sinalou a concelleira de Medio Ambiente, Yoya Neira. Dende o mércores pasado e mentres duren as xornadas de mal tempo, un retén dos servizos de limpeza municipais composto dun tractor e un camión cisterna permanece en Riazor para efectuar arranxos puntuais e limpar a area que poida chegar á beirarrúa e á calzada.

A duna de Riazor, que supera os dous metros de altura na súa cota máis elevada, levantouse por primeira vez no ano 1995 como resposta a un forte temporal que derrubou a antiga balaustrada do Paseo Marítimo ao seu paso por este areal.

A barreira de area permanecerá en Riazor ata mediados de maio, data na que será retirada para deixar as praias preparadas para o gozo da tempada de baño a partir do 15 de xuño.