A enseada do Orzán acolleu esta fin de semana a celebración dunha edición especialmente simbólica do Trofeo Teresa Herrera de Traiñeiras, que chegou este ano á súa 40ª edición masculina e á 10ª feminina. O CR Cabo da Cruz proclamouse vencedor na categoría masculina (5.556 metros de percorrido), cun tempo de 20:25,98, mentres que o CR Salgado-Perillo conseguiu a vitoria na categoría feminina (2.778 metros) cun rexistro de 11:28,16.

Na proba masculina, o podio completárono o SD Tirán-Pereira, na segunda posición cun tempo de 20:41,39, e o SD Samertolameu-Oversea, terceiro cun rexistro de 20:46,63.

Pola súa banda, na categoría feminina, o SD Tirán-Pereira acadou a segunda posición cun tempo de 11:34,06 e o CR Chapela-Wofco foi terceira cun rexistro de 11:41,56.

As finais disputáronse este domingo despois da xornada clasificatoria do sábado, que estreou unha das principais novidades desta edición. Mantívose o formato contrarreloxo, pero as embarcacións tomaron a saída de dúas en dúas e en dous carreiros, en lugar de facelo individualmente. Os resultados da clasificatoria determinaron a composición e orde das quendas finais.

A xornada deste domingo comezou coa tradicional ofrenda aos homes e mulleres do mar, previa á final feminina das 11.30 horas. Posteriormente disputáronse as dúas quendas masculinas, ás 12.00 e ás 12.30 horas. A final mantivo o percorrido clásico do Teresa Herrera, de tres millas, catro longos e tres ciabogas.

O concelleiro de Deportes, Manuel Vázquez, participou na entrega de trofeos e felicitou as tripulacións participantes e, especialmente, os clubs vencedores. "Este dobre aniversario demostra a fortaleza dunha competición que forma parte xa da historia deportiva da Coruña e que cada verán volve unir no Orzán deporte, tradición e a nosa estreita relación co mar", sinalou Vázquez.

CR Cabo da Cruz, vencedor da categoría masculina

Na categoría masculina, o CR Cabo da Cruz conseguiu a vitoria cun tempo de 20:25,98, por diante de o SD Tirán-Pereira e SD Samertolameu-Oversea.

Clasificación masculina

1. CR Cabo da Cruz - 20:25,98

2. SD Tirán-Pereira - 20:41,39

3. SD Samertolameu-Oversea - 20:46,63

Deste xeito, a bandeira masculina continuará en xogo en futuras edicións, ao non conseguir o Club de Remo Chapela encadear a segunda vitoria consecutiva que lle permitiría obtela en propiedade.

CR Salgado-Perillo vence na décima edición feminina

Na categoría feminina, o CR Salgado-Perillo proclamouse vencedora cun tempo de 11:28,16, seguida por SD Tirán-Pereira, que rematou segunda, e o CR Chapela-Wofco, que completou o podio.

Clasificación feminina

1. CR Salgado-Perillo  - 11:28,16

2. SD Tirán Pereira - 11:34,06

3. CR Chapela-Wofco - 11:41,56

A tripulación vencedora recibiu a nova bandeira feminina creada para este 2026, ano no que a competición feminina do Teresa Herrera alcanzou a súa décima edición.

A entrega de premios puxo o punto final a unha fin de semana de remo na enseada do Orzán e a unha edición marcada polo dobre aniversario da competición. O Concello da Coruña e a Federación Galega de Remo volveron colaborar na organización dunha proba consolidada no calendario deportivo da cidade e vinculada historicamente á tradición marítima coruñesa.

"Queremos agradecer o traballo da Federación, dos clubs, das tripulacións e de todas as persoas implicadas na organización, así como a resposta do público que se achegou ao Orzán durante a fin de semana para acompañar unha cita que queremos seguir facendo medrar nos próximos anos", concluíu Vázquez.