A concelleira de Benestar Social, Participación e Igualdade, Nereida Canosa, participou esta mañá na xornada de portas abertas do novo TEU do Birloque, un espazo de uso comunitario situado no recentemente inaugurado Centro Veciñal do barrio. Acompañada de persoal técnico da Concellería, a edil percorreu as instalacións e conversou coa veciñanza, subliñando a utilidade deste novo recurso para fomentar a participación social e a vida en común.

"Con este novo TEU reforzamos a igualdade entre os barrios, ofrecendo un local accesible, versátil e de balde para que a cidadanía poida celebrar, aprender e compartir", sinalou. O local, que conta cun aforo máximo de 30 persoas, poderá reservarse desde mañá a través do sistema de cita previa en liña, seguindo os mesmos criterios que regulan o acceso á rede municipal de espazos TEU.