O Concello publicou hoxe a listaxe de solicitudes admitidas e excluídas na vindeira convocatoria do programa municipal Idiomas do Mundo, unha iniciativa de inmersión lingüística e cultural que lles permitirá a 32 rapazas e rapaces coruñeses experimentar unha estadía dun mes en Irlanda, entre o 26 de xullo e o 23 de agosto.

En total, os servizos municipais avaliaron un total de 114 candidaturas, das que 91 foron admitidas e outras 23 rexeitadas ao non axustarse aos requisitos establecidos nas bases. Agora, ábrese un prazo de dez días hábiles para presentar reclamacións, ata o 20 de marzo. Isto abrirá camiño á posterior publicación das listaxes provisionais e a de agarda.

O incremento de solicitudes con respecto á pasada edición do programa foi substancial, un aspecto que tamén puxo en valor o concelleiro de Educación, Formación e Innovación Tecnolóxica, Juan Ignacio Borrego: "Idiomas do Mundo supón unha grande oportunidade para que a mocidade dos centros educativos da nosa cidade reforce os seus coñecementos en materia de idiomas, tamén para estreitar vínculos con outras culturas e países".

As 32 prazas, destinadas a alumnas e alumnos que están a cursar o primeiro ano de bacharelato na Coruña, outórganse baseándose nos expedientes académicos e tamén se valoran criterios económicos con respecto á unidade familiar solicitante.

Borrego lembrou, ademais, que o Concello financia integramente o programa, cunha dotación de case 150.000 euros. Isto permite asumir entre a totalidade e o 65 % do custo das prazas, en función dos ingresos das familias. "O Goberno de Inés Rey está comprometido coas novas xeracións da mocidade coruñesa, co seu desenvolvemento académico e persoal. E iso é precisamente o que buscamos coa posta en marcha de programas como Idiomas do Mundo ou as Bolsas Norteamérica, no que participaron centos de coruñesas e coruñeses desde hai máis de 20 anos", indicou o edil.