O Teatro Colón incorporará á súa programación de 2027 un dos grandes fenómenos internacionais do teatro musical. 'The Book of Mormon', considerado o musical máis premiado da historia de España, representarase na cidade entre os días 11 e 14 de febreiro dentro da súa primeira xira estatal tras tres tempadas de éxito en Madrid. As entradas para as funcións previstas no Teatro Colón xa están dispoñibles a través da plataforma Ataquilla e na billeteira da Praza de Ourense.

A produción, promovida por ATG Entertainment co apoio do Concello, chega á Coruña despois de superar as 1.000 funcións e reunir máis de 600.000 espectadores no país. O espectáculo acumula ademais 17 recoñecementos, entre eles os galardóns ao Mellor Musical nos Premios Talía, Broadway World e Premios de Teatro Musical, un fito sen precedentes no sector.

O concelleiro de Cultura e Turismo, Gonzalo Castro, destacou a relevancia de incorporar á programación municipal unha produción desta dimensión. "Desde o Goberno de Inés Rey seguimos traballando para que a Coruña sexa unha referencia cultural tamén no ámbito das grandes producións escénicas. A chegada de 'The Book of Mormon' ao Teatro Colón permitirá ao público coruñés gozar dun dos espectáculos máis exitosos e recoñecidos do panorama internacional sen saír da cidade", sinalou.

Creado por Trey Parker e Matt Stone, responsables da serie 'South Park', xunto ao compositor e letrista Robert López, autor das cancións de filmes como 'Frozen' e 'Coco', 'The Book of Mormon' converteuse nun dos musicais máis aclamados do século XXI. A dirección da versión española corre a cargo de David Serrano.

A historia segue as andanzas de Elder Price e Elder Cunningham, dous novos misioneiros enviados a unha aldea de Uganda coa misión de difundir a súa fe. A súa chegada e os intentos por conectar coa realidade da comunidade local desencadean unha sucesión de situacións cómicas e inesperadas que converteron o espectáculo nun referente internacional do humor musical contemporáneo.

A produción mantense actualmente en cartel tanto en Broadway como no West End londiniense, un feito pouco habitual dentro do teatro musical. En Nova York celebrou recentemente o seu décimo quinto aniversario, consolidándose como un dos maiores éxitos da historia recente do xénero. A nivel internacional foi distinguida con nove premios Tony e catro premios Olivier, incluídos os de Mellor Musical en ambas categorías.