10 de octubre de 2023
Os premios entregaranse nunha cerimonia de premios o vindeiro sábado 18 de novembro, que contará coa asistencia dos galardoados
Outorgóuselle o Prisma Especial do Xurado ao Planetario de Pamplona pola súa grande implantación social e nivel de excelencia do equipo
O xurado da XXXVI edición dos Premios Prismas Casa das Ciencias xa decidiu os proxectos premiados para este 2023, no que os traballos optaban a un Prisma de Bronce segundo oito categorías: Vídeo, Novos medios, Texto inédito e audoeditado, Libro editado, Artigo xornalístico, Radio, e Proxectos singulares. Ademais, o xurado tamén outorga un Prisma Especial. Todas as modalidades, excepto a de Libro editado e a de Prisma especial do xurado, están dotadas cun premio de 4.000 euros.
O xurado outorgoulle o Premio Prisma na modalidade de vídeo a Maa-Yiem, la extraordinaria historia de Jordi Sabater Pi de Alfonso Par, por lle dar visibilidade a unha figura fascinante a través dun magnífico relato e o uso exemplar dos recursos cinematográficos. E no caso de mellor traballo en novos medios a Amautas: la aventura del conocimiento, presentado por Javier Santaolalla Camino, Jorge Pérez Melián e José Daniel Edelstein Glaubach por poñer ao alcance do público unha oferta multiformato de contidos divulgativos variada e de gran calidade; xunto co mellor traballo en radio a Desdibuixem les cançons de Marco Mezquida amb les il·lusions musicals, de Laura Farré Rozada, por incorporar a perspectiva das matemáticas á programación cultural dunha emisora pública, achegando a ciencia a novas audiencias.
Na disciplina escrita, o xurado dos Premios Prismas determinou que o premio a mellor libro editado era para La lira desafinada de Pitágoras, de Almudena Martín Castro para Harper Collins Ibérica, por narrar de forma accesible, rigorosa e elegante o complexo vínculo entre a ciencia e a música. O traballo La ciencia de estirar el tiempo, de Eugenia Angulo Alonso para Revista Alfa, foi galardoado co premio a mellor artigo xornalístico por ofrecer unha mirada ao futuro baseada na investigación contemporánea nun texto de gran calidade que acode a fontes diversas e relevantes.
En canto ao premio a mellor proxecto singular foi para o traballo María Andresa Casamayor, presentado por Julio Bernues Pardo, Pedro Miana Sanz, Raquel Villacampa Gutiérrez e Instituto Universitario de Matemáticas y Aplicaciones da Universidade de Zaragoza, por recuperar unha figura descoñecida pero de gran relevancia a través de múltiples formatos e coa participación de diversos axentes sociais.
O xurado decidiu declarar deserto o Prisma ao mellor texto inédito ou autoeditado de divulgación científica. Foron un total de sete os proxectos premiados nas oito modalidades incluídas nas bases.
Premio Especial do Xurado
Ademais, o xurado outorga cada ano un Premio Prisma Especial. Nesta edición, o galardoado foi o Planetario de Pamplona pola súa grande implantación social, o extraordinario impacto público das súas iniciativas e o nivel de excelencia mantido polo seu equipo ao longo dunha extensa traxectoria.
Tamén se decidiu outorgar unha mención honorífica nesta modalidade a Rogelio Sánchez Verdasco, polo seu infatigable impulso de proxectos colectivos e o enfoque innovador do seu traballo sempre xeneroso.
O xurado, que se reuniu entre os días 9 e 10 de outubro, está composto por Elena Lázaro, coordinadora da UCCi na Universidade de Córdoba e presidenta do xurado; Carolina Llorente, coordinadora do Centro de Estudios de Ciencia, Comunicación y Sociedad en Universitat Pompeu Fabra; Óscar Huertas, técnico de Comunicación e Divulgación Científica en CICA-UDC; Manuel Rey, responsable de comunicación no Instituto Galego de Física de Altas Enerxías (IGFAE); Socorro Castro, profesora titular de Química Inorgánica na Universidade da Coruña; e Marcos Pérez Maldonado, xefe de servizo dos Museos Científicos Coruñeses e secretario.
Os premios Prismas son unha iniciativa dos Museos Científicos-Concello da Coruña que pretende potenciar a difusión da cultura científica en España e apoiar a todas e todos os profesionais que traballan neste campo. Entregaranse nunha cerimonia o vindeiro sábado 18 de novembro, que contará coa asistencia dos galardoados. Coa súa organización, o Goberno de Inés Rey contribúe a apuntalar o posicionamento da Coruña como cidade vinculada á divulgación científica.
22 de abril de 2024
30 de marzo de 2024
15 de marzo de 2024
Lo sentimos pero tu navegador es muy antiguo para poder mostrar esta página. Debes de actualizarlo o usar un navegador compatible. Hemos optimizado esta web para Google Chrome, Mozilla Firefox, Opera, Safari y Microsoft Edge. Instalar ahora un navegador compatible