Este mediodía puxéronse á venda as entradas para a actuación que Leiva ofrecerá no Coliseum da Coruña o próximo sábado 30 de abril de 2022. O cantante arrancará a súa xira 'Cuando te muerdes el labio' na nosa cidade, presentando o seu novo traballo, do mesmo nome. 

Leiva regresará á Coruña tras a súa actuación do 2019 dentro da xira 'Nuclear'. As entradas están dispoñibles a través de leivaentradas.com, Ataquilla.com e a billeteira da praza de Ourense. O músico súmase ás grandes actuacións que acollerá o Coliseum durante o 2022, como as de C. Tangana ou Van Morrison.

Por outra banda, este xoves tamén sairán á venda as entradas para o concerto que Malú ofrecerá no mesmo recinto o próximo 17 de setembro. Será ás 12.00 horas do mediodía cando estarán dispoñibles nas canles habituais. A cantante presentará na Coruña o seu último traballo: 'Mil Batallas'.

Adiamento de Il Divo

Por outra banda, por motivos alleos á organización e que afectan á saúde dun dos integrantes de Il Divo, o concerto previsto para o venres 22 de decembro no Coliseum quedou aprazado. A nova data será o venres 15 de xullo de 2022.

As entradas adquiridas para o concerto de decembro serán válidas para esta nova data. Para os compradores ou compradoras que non desexen asistir á actuación de xullo, ábrese un prazo de devolución ata o 4 de xaneiro. Dita devolución deberase solicitar a través da mesma canle de compra.