As Noites de María Pita recibirán mañá, martes 11 de agosto, ás 22.00 horas, a unha das bandas galegas do momento. The Rapants, cuarteto nacido en Muros en 2018, presentará na praza de María Pita o seu novo traballo discográfico, 'Rapants Club', dentro da programación das Festas de María Pita 2026.

A formación chega á cidade nun dos momentos máis destacados da súa traxectoria. Tras converterse nun dos grupos máis demandados dos escenarios galegos e estatais, The Rapants continúa consolidando unha proposta musical que combina pop, garage rock, influencias disco e unha potente enerxía en directo.

A alcaldesa, Inés Rey destacou a presenza da banda dentro da programación festiva. "Seguimos apostando polo talento musical galego e por ofrecer espazo nas grandes programacións da cidade aos grupos que están a marcar o presente da nosa música. The Rapants representan como poucos a forza da nova escena galega e a capacidade dos nosos artistas para conectar con públicos moi diversos", sinalou.

O grupo presenta neste concerto as cancións de 'Rapants Club', o seu cuarto álbum de estudo, publicado este ano. O disco supón unha nova evolución na súa traxectoria artística, incorporando unha maior variedade estilística, novas influencias electrónicas e sonoridades máis próximas á música disco, sen renunciar á identidade que caracteriza á banda. O traballo inclúe doce temas e colaboracións de artistas como Joe Crepúsculo, Sara Faro e Antía Ameixeiras, nun proxecto que combina guitarras contundentes, sintetizadores, letras con novos matices e estribillos chamados a converterse en novos himnos para o público da formación.

The Rapants consolidáronse nos últimos anos como unha das propostas máis destacadas da música galega contemporánea. O seu anterior álbum, 'La máquina del buen rollo', foi recoñecido co Premio MIN ao Mellor Álbum en Galego, e permitiulles percorrer escenarios e festivais de toda a Península.

A actuación forma parte das Noites de María Pita, un dos ciclos centrais das Festas de María Pita 2026, que ao longo do mes de agosto reúne na praza artistas galegos, estatais e internacionais, consolidando A Coruña como un dos principais referentes culturais do verán.