Esta fin de semana celebraranse dous concertos no Coliseum da Coruña, que pechará por todo o alto as grandes actuacións musicais deste 2024. Trátase de Ana Mena e Rod Stewart, concertos para os que aínda queda un número limitado de entradas á venda.

No caso de Ana Mena, será o segundo ano consecutivo que actúe no Coliseum, tras facelo en decembro do 2023. Neste caso, a cantante está pechando a súa xira 'Bellodrama 2024', que a levou a actuar por todo o territorio nacional en diferentes grandes recintos e festivais. O seu concerto será este sábado 14 a partir das 22.00 horas. As últimas entradas pódense adquirir a través de Ataquilla e do despacho de billetes da praza de Ourense. Ana Mena presentará na Coruña algúns dos seus últimos grandes éxitos, como son 'LAS 12', 'Música ligera', 'Madrid City' e 'Quiero decirte'.

Por outra banda, o domingo 15 haberá outro concerto moi especial no Coliseum. Será o de Sir Rod Stewart, que ofrecerá unha das últimas actuacións da súa carreira, pois o artista británico confirmou que esta será a súa última xira, que leva por nome 'One last time'. Nas últimas semanas habilitouse un número limitado de entradas para o concerto, que están á venda en diferentes plataformas dixitais como Ticketmaster ou El Corte Inglés.

Rod Stewart é un dos artistas con máis vendas da historia da música gravada, con máis de 250 millóns de discos e singles vendidos en todo o mundo. O seu concerto comezará ás 21.00 (apertura de portas ás 19.30 horas). Co concerto do artista británico pecharase o ano musical do Coliseum, polo que pasaron grandes artistas nacionais e internacionais, como Juan Luis Guerra, Queens of the Stone Age, Camilo, Maná, Ricky Martin ou Emilia Mernes.