A concelleira de Igualdade, Benestar Social e Participación, Yoya Neira, fixo entrega esta tarde no pazo municipal de María Pita de 150 diplomas ás persoas participantes nos 20 cursos impartidos a través do programa "Escola de Participación 2019".

No seu labor de apoio ás diferentes asociacións e entidades sociais, o Concello ofrece a "Escola de Participación", un espazo de formación, aprendizaxe e colaboración para entidades e colectivos informais da cidade. O obxectivo é ofrecer unha formación completa, de calidade, aberta á cidadanía e gratuíta, para capacitar máis e mellor ás entidades, colectivos e persoas que traballan nos proxectos sociais e que contribúen a mellorar a nosa cidade.

Ademais, a través da "Escola de participación" preténdese ofrecer as ferramentas necesarias para aumentar e mellorar a participación na vida municipal, contribuíndo a facela máis diversa, máis inclusiva, máis próxima e, sobre todo, máis accesible a toda a cidadanía.