Cando o viaxeiro pretende plasmar nunha fotografía calquera vivencia, existen dous momentos esenciais para facelo. O primeiro cando acabas de chegar ao país con ollos novos e captas aquilo que che sorprende, e o segundo prodúcese a partir do momento no que es capaz de apreciar os detalles diferenciadores desa cultura con respecto á túa. Ambos son imprescindibles e complementarios para conseguilo.

En China, a fábrica do mundo occidental, as imaxes convértense no máis vivo expoñente dunha sociedade na que é posible apreciar coma un crecemento económico desaforado induce a un sistema social e a un reparto da riqueza non sempre equilibrado, onde as oportunidades se abren a todos pero só chegan a unhas minorías, e onde o tradicional e o moderno están obrigados a convivir, producíndose de continuo unha estraña maridaxe.

As fotos son só iso, fotos. Pero son, tamén, un asexadoiro que nos amosa comportamentos e actividades cotiás que conforman unha forma de vivir a vida diferente á nosa.

Esta mostra fotográfica elaborouse coa intención de trasladar tan só unhas pequenas pinceladas de momentos que todos os días se producen nalgunha das grandes e pequenas cidades dese sorprendente país.