Félix Rodríguez e a Fran Rei tráennos Saaabor!, unha proposta cómica, para todos os públicos, de creación propia e dirixida por Avelino González. Un espectáculo cómico que mestura música, maxia, humor, moito ritmo e participación do público, co mundo da gastronomía de fondo. Félix Rodríguez e Fran Rei, os nosos protagonistas, convértense durante unha hora en dous recoñecidos chefs que nos ofrecen un gorentoso, equilibrado e, sobre todo, afinado menú do día: unha comida moi musical para toda a familia. A gastroneta de Saaabor! chega á vila, un carro de xantar do que xorden infinidade de xogos cómicos, xogos máxicos e unha chea de obxectos de cociña cos que facer música. Unha hora de humor nun espectáculo gastronómico onde teñen cabida tanto a música como a cociña en directo. Unha produción que deixará a todo o público cun moi bo sabor de boca.

Unha proposta de lecer en familia para familias da compañía Culturactiva SCG.

A actividade desenvolverase no auditorio do Centro Ágora, sen inscrición e con entrada libre ata completar a capacidade.

Pídese puntualidade.

Organiza Normalización Lingüística do Concello da Coruña dentro do programa Apego.