Di Marta Pardo de Vera que as súas obras e as das súas compañeiras de exposición son "moi diferentes", a pesar de que pertencen á mesma xeración e á mesma cidade. Ata o 3 de outubro poden verse as súas creacións na sala de exposicións da terceira planta de Afundación, no Cantón Grande. Son cadros das tres, de Marta López Castro, de Guadalupe Sanjurjo Aler e de Marta Pardo de Vera. Cada unha co seu particular estilo e as súas maneiras de entender a arte. Pardo de Vera apostou para esta cita por mostrar "un mundo de cor", por "contar cousas" a través dos seus pinceis e os seus lenzos, por capturar un momento concreto, conxelalo e evocar toda unha realidade ao seu redor, aínda que non se esquece, tampouco, dos retratos, das caras das persoas que lle poñen ollos, nariz e boca ás súas obras.

Marta López Castro, con todo, opta por inmortalizar A Coruña, e faio desde un punto de vista naif, segundo a súa compañeira de exposición, e valéndose moito da cor na súa paleta, de verdes, amarelos, azuis e vermellos intensos para facela protagonista das súas estampas da cidade.

Guadalupe Sanjurjo Aler colgou das paredes de Afundación retratos e paisaxes, "cun estilo máis académico" que o das demais e buscando a reflexión do seu público.