Desde a súa primeira edición en 2014, Mar de Mares reuniu a algúns nomes imprescindibles no estudo, a creación artística e a defensa dos océanos, como son David Doubilet, Cristina Mittermeier, Mandy Barker, Cristóbal Serrano, Jennifer Hayes, Daniel Beltrá, Lucy Gilliam, Telmo Aldaz de la Quadra-Salcedo, Skeleton Sea, Isabel Muñoz..., e moitos outros nomes que nos levaron a mares remotos e ás profundidades dos océanos para darnos a coñecer a impresionante beleza e a importancia vital dos mares nas nosas vidas.

Os mares galegos e as súas xentes foron tamén grandes protagonistas en todas as edicións; artistas, científicos/as, divulgadores/as, cociñeiros/as, navegantes, e activistas, entre moitos outros, emocionáronnos coas súas historias e obras sobre as costas de Galicia; Xulio Villarino, Jorge Candán, Iván Domínguez, Manuel Rivas, Sekone, Susana San Román, María José Arceo, Xosé Iglesias, Domingo Villar e Nacho Carretero, son só algúns dos nomes dos galegos e galegas que nos contaxiaron o seu espírito atlántico.

Nestes sete anos máis de 160.000 persoas gozaron das máis de 200 actividades programadas, unha cifra que nos enorgullece especialmente, porque o festival está pensado por e para a cidadanía e todos os anos o festival ofrece decenas de actividades participativas e abertas a todo tipo de público; exposicións, talleres activistas, encontros inspiradores, intervencións artísticas, ciclos de cinema, gastronomía, visitas intermareais, percorridos en veleiro, un mercado do mar... Unha programación lúdica e inspiradora para lanzar unha mensaxe realista sobre o presente e optimista en canto ao futuro, e achegar numerosas solucións e ideas que convidan á reflexión e á acción. E o mellor de todo, pensada para non deixar ninguén en terra, con actividades para todos os públicos e todas as idades; amantes da música, persoas apaixonadas da arte, para foodies e para tolos/as da navegación, para activistas da natureza e para emprendedores/as responsables e consumidores/as concienciados/as, para lectores/as e cinéfilos/as e para amantes da acción e o deporte.