Esta idea de still life serve así como un modo, dos centos que pode haber, de achegarse á obra dun dos artistas máis ousados á vez que reflexivos que existen (nótese que non se di "cineasta", que non deixaría de ser un termo tramposo ou insuficiente á hora de referirse a Malcolm Le Grice). A idea de still life serve na medida en que Le Grice empeza a súa andaina como pintor, e na medida en que varias das súas obras fan alusión directa a ese xénero e utilízano á maneira dos pintores antes citados para investigar o propio cinema como soporte, desligándose da narración ou do suposto rexistro realista da realidade, para investigar de maneira plástica, reflexiva e performativa iso que coñecemos como cinema. A película é, pois, a propia tira de celuloide ou conxunto de píxeles, non as hipotéticas mazás do bodegón en movemento, e é tamén o que ocorre mentres o espectador a mira, nese "aquí e agora" da proxección na que cada un de nós constrúe a súa propia película.

Esta selección de películas de Le Grice, aínda que breve e parcial, serve para dar conta das múltiples formas que adoptou esas ambicións ao longo do tempo, desde que empezase a experimentar co soporte fílmico nos anos sesenta no seo da soada London Film-makers Co op (na que tivo un papel crucial, non só como artista senón poñendo en marcha o taller no que se producirían moitas das obras da cooperativa), pasando polas súas primeiras experiencias con ordenadores nos setenta, o paso definitivo ao vídeo nos oitenta e a explosión de posibilidades do dixital.

Programa 1

• CHINA TEA

  Malcolm Le Grice, Reino Unido, 1965, dobre proxección 8mm a vídeo, 10 min.

  O tema era unha natureza morta (un xogo de té chinés negro), filmada de preto, as cámaras movéndose ao redor e a través das cuncas e a teteira. A banda sonora, en cinta, foi feita cun piano preparado (con paíños de madeira inseridos entre as cordas e os martelos), influenciado polo son da música chinesa. (Malcolm Le Grice)

• YES NO MAYBE MAYBENOT

  Malcolm Le Grice, Reino Unido, 1967, dobre proxección de 16mm a vídeo, 8 min.

  Unha dobre proxección de imaxes de auga caendo na central eléctrica de Battersea transformada por medio da superposición de negativo e positivo creando unha efecto de baixo relevo en movemento.

• ART WORK SERIES: PART 1 ACADEMIC STILL LIFE (CÉZANNE)

  Malcolm Le Grice, Reino Unido, 1976-77, 16mm, 6 min.

  Como o título indica, este é un traballo deliberadamente académico, concibido da mesma maneira na que un compositor faría un "estudo". Non trata sobre a pintura de Cézanne, senón que intenta aplicar certos conceptos relacionados coa relatividade dos puntos de vista cambiantes na observación e o rexistro. Da mesma maneira en que as pinturas de Cézanne rexistran dentro da súa imaxe o problema da estabilización da percepción e a maneira na que os cambios de punto de vista modifican a experiencia espacial, a película usa o time lapse e as exposicións prolongadas para buscar un equivalente fílmico desta estética. (M.L.G.)

• DIXITAL STILL LIFE

  Malcolm Le Grice, Reino Unido, 1984, vídeo, 8 min.

  Retomando a idea da natureza morta (a froita, o froiteiro) e botando mans tamén de imaxes relativas ao proceso e o contexto (o xardín, o propio Le Grice, un piano), unha película feita cun ordenador Atari, manipulando a cor e a imaxe a través dun programa, que tamén define a secuencia de imaxes e a música producida cun sintetizador MIDI.

• AFTER MONET WATER LILIES

  Malcolm Le Grice, Reino Unido, 2008, vídeo, 3 min.

  A miña experiencia aos catorce anos de idade das pinturas panorámicas a grande escala do xardín de nenúfares de Monet son un recordo artístico crucial para min. Houbo múltiples versións do material que filmei cara a 1984 de nenúfares, xuncos e un estanque. (M.L.G.)

• DIGITAL ABERRATION

  Malcolm Le Grice, Reino Unido, 2004, vídeo, 4 min.

  Todos os efectos visuais baratos dun paquete de edición de vídeo e unha banda sonora feita co software gratuíto que viña nun paquete de cereais. (M.L.G.)

• ABSINTHE

  Malcolm Le Grice, Reino Unido, 2010, vídeo, 1 min.

  A visita a un pequeno café nun canellón de Praga en busca dunha salchicha e de viño conduciume a probar por primeira vez a absenta -ecos de Manet, Degas e Picasso. (M.L.G.)

• FINITI

  Malcolm Le Grice, Reino Unido, 2011, vídeo, 30 min.

  FINITI é unha forma provisional, deseñada para reter a incerteza e a latencia da interpretación xunto ao compromiso emocional, psicolóxico e intelectual nos momentos fugaces, como en Finnegan's Wake, de Joyce. Espero que calquera interpretación do todo sexa imposible. Representa a experiencia artística por encima das ideas. (M.L.G.)