Este artista marinense, autodidacta e cunha longa traxectoria, leva media vida percorrendo as aldeas en busca de ritmos, coplas e danzas.

Despois de iniciar a súa carreira profesional xunto a Ugía Pedreira (Marful) e o grupo Ecléctica Ensemble, uniuse como cantante e percusionista á banda de Xosé Manuel Budiño, co que fixo series de concertos por escenarios de medio mundo.

Acaba de publicar o seu último traballo, Lobos, inspirado precisamente nos lobos, desde os de Isaac Díaz Pardo para Sargadelos ata os que cantan e se converten en home. O disco foi presentado no mes de xullo no Calgary Folk Music Festival (Canadá).

Os temas deste traballo serán os protagonistas deste concerto. Temas feitos desde o corazón, como un agradecemento a todas esas pandereteiras e bailadoras maiores, mulleres fortes e anónimas, que ensinaron a Davide a ser o que é. E desde esa enerxía local a súa música transfórmase en son global.