Da man da súa autora Pilar Alvarellos descubriremos o libro de relatos de terror "Momentos casi perfectos para morir", publicado no mes de xaneiro de 2022 pola editorial Angels Fortune.

En palabras da propia Pilar, os mitos e lendas que lle contaban de nena sobre aparicións, pantasmas e seres mitolóxicos que moraban nos bosques galegos, en brazos da súa avoa mentres o lume chispeaba na lareira formando sombras, avivaban a súa imaxinación e marcou o seu camiño: escribir relatos sobre aqueles temas que tanto lle fascinaban e que ás veces non lle deixaban durmir.

Sinopse (Angels Fortune Editions)

66 historias de terror. 6 momentos casi perfectos para morir.

Unha noite sen lúa, a loucura colleume da man e levoume polo sendeiro do misterioso, fantástico, tenebroso. Mostroume a morte en forma de can, de xoguetes en miniatura, de demos, asasinos en serie, en seres doutros planetas, paxaros, coitelos usados en rituais aos deuses. Amosoume o que a desesperación fai ás persoas, historias sen finais felices. A loucura posuíu a miña mente e comecei a divagar, soa, perdida en medio da escuridade da miña mente, ás veces albiscaba algo de esperanza, pero de forma fugaz, como un chisco de sal necesario para aderezar o caldeiro da morte nas profundidades do averno.