O 8 de xuño celébrase o Día Mundial dos Océanos e con ese motivo o Aquarium Finisterrae organiza unha actividade de visitas guiadas nas que se fará un percorrido polos módulos do centro dedicados aos mares.

A visita comezará na Oceanosfera, o proxector esférico dixital que recrea procesos a escala global, coa proxección de «Planeta azul», dedicado á auga.

A continuación farase unha parada no módulo dedicado á salinidade, lembrando que a maior parte da auga no noso planeta está nos océanos. Tamén se visitará o módulo das correntes mariñas, e o dedicado ás mareas.

Ademais, partindo de que o océano é unha parte indisoluble da historia e cultura da humanidade, abordarase o espazo «Historias dos mares», onde se contará a orixe dos nomes dos océanos e algunhas anécdotas curiosas.

A visita guiada finaliza nos tanques de gran volume de Maremagnum, onde o público asistente poderá identificar as principais especies que poboan as principais paisaxes submarinas da costa atlántica.