A Banda Municipal de Música da Coruña (BMMC) pechará este xoves a súa tempada de concertos sinfónicos no Teatro Colón. Será a partir das 20.00 horas, nunha 'Velada de musicais' que dá continuidade á programación prevista pola agrupación no seu Ciclo de Primavera.

Nesta ocasión, as e os profesionais da Banda interpretarán pezas clásicas de musicais ben coñecidos polo público, como 'Os miserables', 'A pantasma da ópera', 'My fair lady', 'Cats' e a 'West Side Story'. Interpretaranse un total de once fragmentos, inspirados en composicións orixinais de autores como Alfred Reed, Leonard Bernstein, George Gershwin e Andrew Lloyd Webber, entre outros.

O concerto, que segue a estela festiva das actuacións xa levadas a cabo este ano pola Banda Municipal, contará ademais coa participación do barítono coruñés Pedro Martínez Tapia e a soprano arousá Marina Penas, que acompañarán a banda para redondear a interpretación das pezas inspiradas nos musicais.

Tapia, que tamén é director da Coral Polifónica El Eco, licenciouse na Escola Superior de Canto de Madrid, comezou o seu percorrido nos coros infantís e xuvenís de El Eco e Cantábile. Penas, pola súa banda, comezou os seus estudos de interpretación na Escola de Música Bernardo del Río e completou a súa formación anos despois cun Grao Superior de Música na especialidade de Canto no Conservatorio Superior de Música de Vigo. Xa posteriormente, recibiu clases de prestixiosos mestres de canto entre as que destacaron Montserrat Caballé, Alicia Nafé ou Roberto Accurso, entre outros.

Como xa é habitual, a sesión será de acceso libre ata completar a capacidade do recinto. Retransmitirase tamén en directo a través da canle oficial da BMMC en YouTube.