O Concello colabora na organización da oitava edición do Modulartec, un encontro de síntese modular que se volverá realizar na Coruña a vindeira semana, os días 2, 3 e 4 de outubro, cunha aposta pola visibilización da música electrónica e experimental en espazos singulares e de gran valor patrimonial.

Concertos, obradoiros e actividades paralelas converterán a cidade nun espazo de descubrimento para a música electrónica creada mediante sintetizadores modulares e analóxicos, que lle ofrecerá ao público experiencias únicas en enclaves históricos. Nesta edición, o festival desenvolverase na Fundación Luís Seoane, no Planetario da Casa das Ciencias, na Igrexa das Capuchinas, na Igrexa da Orde Terceira de San Francisco e na Capela de San Eduardo de Palavea.

A entrada será de balde ata completar a capacidade, agás a xornada inaugural do xoves no Planetario, coa actuación dos Poupées Electriques, que require reserva previa a través de Enterticket, da páxina web do festival ou da propia Casa das Ciencias.

O concelleiro de Cultura e Turismo, Gonzalo Castro, convidou a cidadanía a non perder detalle da programación do Modulartec, que contará coa participación de artistas galegos, nacionais e internacionais, profesionais de diversas vertentes e estilos da música electrónica experimental.

Haberá tempo para gozar de artistas como a portuguesa Clothilde, do dúo Ego Death e dun dos grandes nomes da experimentación europea, o alemán Félix Kubin. "E ademais, contaremos con representación da nosa terra: entre eles, o artista visual Mahoney e tamén Carme López, que interpretará o seu álbum Quintela, escollido como un dos mellores discos de ambiente deste ano, con prestixio internacional e que está a soar nos mellores festivais de electrónica de Europa", apuntou Castro.

Toda a información desta edición do Modularte está dispoñible na súa web oficial.