O vindeiro martes 7 de abril, ás 20.00 horas, a Fundación Luis Seoane será o escenario dun diálogo único entre dúas das figuras máis transgresoras da escena actual: Rodrigo Cuevas e Nuno Pico, a alma detrás de Grande Amore. Este encontro servirá como antesala de luxo para o esperado concerto de Rodrigo Cuevas no Coliseum o próximo 30 de abril, a que será a súa única data en Galicia este ano. As entradas para a súa actuación continúan á venda en Ataquilla e no despacho de billetes da praza de Ourense.

"A nosa alcaldesa, Inés Rey, puxo desde o 2019 o folclore e a música popular no centro das políticas culturais da cidade, dándolle espazos a formacións e artistas que ata entón eran inimaxinables", sinalou Gonzalo Castro, concelleiro de Cultura e Turismo. Na Seoane, o público poderá ser testemuña dunha conversación honesta e imprevisible sobre tradición, identidade e a electrónica como ferramenta de axitación social. Rodrigo Cuevas (Oviedo, 1985) chega á Coruña consagrado como unha "anomalía fermosa" no panorama musical español. Premio Nacional das Músicas Actuais en 2023, Cuevas construíu un universo onde o folclore conversa co cabaret e a electrónica. Tras o éxito de 'Manual de Romería' (Mellor Disco Nacional por Rockdelux), o artista presenta agora 'Manual de Belleza', o peche dunha triloxía que redefiniu a música popular en España.

Este novo traballo preséntase como un exercicio de etnografía pop, onde Cuevas reivindica a beleza non normativa -a das mans calosas e a dignidade do rural- a través dun son que funde pandeiros e acordeóns cunha electrónica de vangarda que bascula entre o ambient e o techno. Os seus directos convertéronse en auténticos rituais modernos onde o folclore se abraza coa cultura queer.

O encontro do 7 de abril será unha oportunidade excepcional para profundar nas ideas de dous creadores que souberon converter a tradición en algo perigosamente moderno e profundamente emocionante. A entrada será libre ata completar capacidade.