A Orquestra Sinfónica de Galicia (OSG) participou na gravación de 'Somos Más', a canción oficial do Mundial 2026, un proxecto internacional que une América Latina, Estados Unidos e España nunha mesma mensaxe de celebración e diversidade. "Estamos moi orgullosos deste fito histórico para a OSG, que acada unha dimensión global nun dos eventos masivos máis importantes", sinalou Inés Rey, alcaldesa da Coruña.

'Somos Más' é unha creación do recoñecido compositor e produtor Julio Reyes Copello, con orquestración do mestre Antonio Medellín-Fajardo, quen concibiron unha peza na que conviven a emoción do formato sinfónico coa enerxía contemporánea do pop e do urbano latino. A Sinfónica de Galicia gravou todas as seccións orquestrais nos Estudios Mans da Coruña, en sesións conectadas en tempo real cos equipos de produción situados en Los Ángeles e Miami, dous dos centros neurálxicos da industria musical internacional. Esta colaboración simultánea entre ambas beiras do Atlántico permitiu integrar a orquestra na complexa arquitectura vocal, rítmica e dixital da canción.

A dirección musical estivo a cargo de José Trigueros, director asociado da OSG, quen liderou unha gravación de alta precisión artística e técnica, adaptada ás necesidades dun proxecto global concibido para millóns de oíntes en todo o mundo.

A canción 'Somos Más' preséntase hoxe oficialmente a nivel mundial, marcando o inicio da campaña musical do Mundial 2026. A participación da Orquestra Sinfónica de Galicia neste lanzamento internacional consolida a súa presenza en proxectos de grande visibilidade global e subliña a súa capacidade para integrarse en producións contemporáneas de enorme alcance.