A concelleira de Medio Ambiente, Yoya Neira, destaca o esforzo do Goberno local na transformación do barrio a través da mellora do espazo público, a mobilidade e a participación cidadá.

Corpo:A concelleira de Medio Ambiente, Yoya Neira, participou hoxe na Sagrada Familia no quinto encontro do Grupo Local do proxecto Urbact COPE, un programa europeo no que o barrio coruñés desenvolve, xunto a distritos doutras sete cidades europeas, unha experiencia de participación cidadá nas políticas verdes a través dun enfoque local.

Neira salientou o esforzo que está a facer o Goberno local neste barrio coruñés en plena transformación, grazas á peatonalización e á mellora do espazo público e da mobilidade.

O proxecto Urbact COPE, financiado con fondos europeos, finaliza este ano co deseño dun Plan de Acción consensuado con todas as entidades participantes -entre as que se atopan a Universidade, asociacións veciñais, clubes deportivos e entidades sociais-, así como coa creación dunha marca de barrio que reflicta a nova identidade deste distrito coruñés en proceso de renovación.