As agrupacións 'Troula Seguido' e 'Os mismos de sempre' gañaron o concurso de comparsas do desfile de Entroido, celebrado este sábado nas rúas da Coruña. Unhas 16.000 persoas seguiron o paso das agrupacións e das carrozas polo centro da cidade.

Nesta edición houbo un total de 25 asociacións da cidade e de distintos puntos de Galicia inscritas, das cales 21 participaron no concurso de comparsas, na modalidade de vestiario, coreografía e orixinalidade, e carrozas. O xurado, que se situou nas oficinas do Instituto Municipal Coruña Espectáculos (IMCE) na Casa Paredes, estivo formado por representantes institucionais do Concello, do propio IMCE e da Asociación de Coros e Danzas Eidos. así como por profesionais do tecido cultural da cidade.

Os vehículos e as comparsas partiron de San Andrés e desfilaron polo Cantón Grande e a avenida da Marina ata Porta Real, por onde accederon á praza de María Pita. A banda portuguesa Kumpania Algazara amenizou a chegada dos participantes. 

A alcaldesa da Coruña, Inés Rey, foi a encargada de entregar os premios ás comparsas e carrozas gañadoras. A rexedora destacou a gran variedade e calidade que amosa este desfile. "O Entroido coruñés está máis vivo ca nunca grazas ao esforzo que realizan as asociacións e as comparsas nestas datas", sinalou.

No concurso de comparsas na modalidade de vestiario, coreografía e orixinalidade, os premios, que oscilaron entre 1.500 e 500 euros, foron para a Asociación Gastronómica e Cultural 'Troula Seguido', vencedora; 'Os mismo de sempre', co segundo premio; a Asociación Galega de Teatro Musical, terceira na clasificación final e gañadora tamén do premio á orixinalidade; e 'Los infieles', que obtivo o cuarto premio.

Por outra banda, no concurso de carrozas os premios foron para 'Os mismos de sempre', gañadores, seguidos pola Asociación Gastronómica e Cultural 'Troula Seguido', co segundo premio; a Asociación Urbilar, terceiro premio; e 'Los infieles', cuarto premio. 'Os mismos de sempre' repetiron tamén galardón na categoría de orixinalidade.

Comparsas e carrozas que participaron no desfile de Entroido

• ONCE 
• Festarrachada 
• Asociación Galega de Teatro Musical 
• El justiciero
• Pantaleón 
• Bolivia pachá 
• Melandrainas 
• Kilomberos de Monte Alto 
• Bribesly Hills 
• Urbilar 
• Amigos da Xoldra 
• Tarde mal e arrastro 
• Monte Alto a 100
• Os Maracos 
• Os peixes de Cambre 
• Troula Seguido 
• Morenada Bolivia sin Fronteras 
• Os mismos de sempre 
• Os subterráneos 
• Malandros
• Los infieles 
• Ana Fuentes Candal (Fóra de concurso)
• David Purriños (Fóra de concurso)
• La madriguera de Pichi (Fóra de concurso)
• Estrelas da Noite (Fóra de concurso)