Os barrios de Palavea e Labañou estarán de celebración esta fin de semana. O sábado, 13 de xuño, a praza da Tolerancia acollerá a Festa dos Porcos, nunha xornada na que reinará o tradicional arroz con porco e que terá un amplo cartel musical aberto á veciñanza que inclúe grupos como Omiri, A banda da Balbina, Los Jinetes del Trópico, Adhara & Ritman e La Yaya DJ. 

"Os barrios desta cidade teñen unha vida vibrante e unha xente que sabe encher as rúas de alegría. O Goberno de Inés Rey defende a grande importancia cultural das celebracións populares, que axudan a facer identidade e comunidade, por iso poñemos os medios económicos e o apoio necesario para 26 festas populares para este 2026. Iso é falar con feitos", apuntou o concelleiro de Cultura e Turismo, Gonzalo Castro. 

Completarán o programa lúdico as actuacións de combos de música moderna do CMUS Profesional da Coruña, a rutina circense de Paty Diphusa, a proposta tradicional de Donaire e das pandeiretas da Asociación de Veciños de Labañou, a dinamización da Lilicleta e a organización de varios xogos tradicionais para o desfrute das e dos máis pequenos. 

Ademais, o pregón terá unha temática moi especial. Será unha celebración do 50 aniversario da Asociación Veciñal do barrio. A Festa do Porco foi recuperada pola veciñanza no ano 2019, recollendo o legado da tradicional romaría popular. A comida terá prezos populares e espera acoller a centos de persoas. 

Así mesmo, Palavea celebra as festas de Santo Antonio e Santa Cristina a partir do sábado ás 13.00 h, momento no que comezará a sesión vermú co grupo Los Kibbis. Ás 16.00 horas será a actuación do Grupo de Musicoterapia de Palavea. Ás 17.00 h, a presentación dun libro de fotografía sobre o barrio, de José Carlos Alonso, no centro cívico. E, á mesma hora, a actuación de Kamándula. Ás 18.00 h, unha actividade de iniciación á esgrima coa entidade deportiva 100 Tolos. Á mesma hora, subirá ao escenario a Agrupación Musical Emilia Pardo Bazán. A partir das 20.00 h, tocarán xuntos os artistas Camino Karachi, Gitano Antón e Maxi Jeremies, seguidos por Los Platinos, ás 21.30 h. Pechará a primeira xornada DJ Takesound ás 00.00 h. 

O programa do domingo comezará aínda máis cedo, ás 10.00 h, coa alborada a cargo da Asociación Cultural Folclórica Folerpas. Ás 12.00 h, será a misa na capela de Santo Eduardo e a tradicional procesión. Ás 14.00 h, sesión vermú con Yeisimusic, e despois de comer, ás 17.00 h, abrirá a Área Infantil de Xogos Variados para os nenos e nenas. Ás 18.00 h actuará A Trova Coruñesa, ás 20.00 h o Grupo 13B e, ás 21.00 h haberá unha queimada. O grupo Caramba chegará ás 21.30 h e, como colofón final, os ritmos de DJ Marcos Magán, ás 00.00 h. 

Aquí tamén se fala

Precisamente na praza da Tolerancia terá lugar mañá, 12 de xuño, a partir das 17.00 horas, a terceira edición do festival de música tradicional Aquí tamén se fala, que converterá A Coruña nun dos grandes epicentros da música en galego e das culturas atlánticas. O proxecto é unha iniciativa impulsada desde o IES Rafael Dieste que conta co apoio do Concello.

O evento consolídase este ano como un festival de dimensión internacional grazas á incorporación ao cartel da artista portuguesa Carolina Deslandes, unha das voces máis relevantes da música lusa contemporánea e auténtico fenómeno social. A presenza de Deslandes marca un novo fito para un festival que, desde a súa creación, conseguiu situar a música e a lingua galegas nun espazo de prestixio, convivencia e celebración colectiva. Xunto á artista portuguesa actuarán as bandas galegas Apolo 18, Kid Mount e De Ninghures, tres propostas que representan a diversidade, a renovación e o momento de efervescencia creativa que vive actualmente a música galega.