O Teatro Colón acollerá este domingo 9 de agosto, ás 21.00 horas, o espectáculo 'As Times Goes By. Homenaxe a Sinatra', protagonizado polo barítono galego Borja Quiza e incluído tamén na programación das Festas de María Pita 2026. A entrada ao espectáculo será de balde ata completar capacidade.

A proposta ofrecerá un percorrido por algunhas das melodías máis populares da canción americana do século XX, convertidas co paso do tempo en auténticos estándares do jazz e inmortalizadas por artistas como Frank Sinatra, Billie Holiday, Ella Fitzgerald, Bing Crosby ou Lena Horne. Acompañado por Fernando Briones ao piano, Iñigo Azurmendi ao contrabaixo e Miguel González ao saxofón, Borja Quiza interpretará temas tan coñecidos como 'As Time Goes By', 'Blue Moon', 'Night and Day', 'Cheek to Cheek', 'Strangers in the Night', 'I've Got You Under My Skin' ou a emblemática 'New York, New York'. O espectáculo ten como obxectivo divulgar o patrimonio musical da canción americana e reivindicar a súa influencia na cultura popular contemporánea, ofrecendo ademais unha visión singular destas composicións a través da voz lírica de Borja Quiza. 

Natural de Ortigueira, Borja Quiza é un dos grandes nomes da lírica galega e desenvolveu a súa carreira nos principais teatros e auditorios de España e do ámbito internacional. Ao longo da súa traxectoria foi recoñecido co Premio Ópera Actual ao mellor cantante novo e co Premio ao Mellor Cantante de Zarzuela dos Premios Líricos Teatro Campoamor, entre outros galardóns.