O Concello deu comezo aos traballos para a construción dunha nova glorieta na rúa Curros Enríquez, na intersección coas rúas Zalaeta e Ramón del Cueto. Trátase dunha actuación que lle dá resposta ás demandas veciñais e que ten como obxectivo mellorar o tránsito e a seguridade viaria neste cruzamento. A intervención está incluída na ampla programación de mantemento de calzadas nos barrios promovida polo Goberno de Inés Rey. 

"Seguimos a traballar en cada rúa, en cada cruzamento dos barrios, intentando dar unha resposta o máis rápida posible a todas as necesidades e peticións veciñais. Neste caso, levamos a cabo unha obra que suporá un alivio para moitas persoas que a diario pasan por ese punto e que agora poderán circular con máis seguridade", subliñou o concelleiro de Infraestruturas, Jesús Celemín. 

A nova glorieta suporá a reordenación deste punto, coa correspondente colocación da nova sinalización, o repintado do pavimento para indicar as zonas de circulación e a relocalización dunha das luminarias.

Humanización de Atocha Alta

Tamén no barrio de Monte Alto, o Concello ten en marcha o proxecto de humanización da rúa Atocha Alta, cun investimento total de 364.794,82 euros. O proxecto está englobado dentro das numerosas actuacións levadas a cabo polo Goberno de Inés Rey no marco do Plan de Barrios 2025-2027, que leva máis de 81 millóns de euros mobilizados en actuacións de mellora de todas as áreas da cidade, con especial atención ás peticións e necesidades veciñais. 

A actuación na Atocha Alta inclúe a execución de pavimentos peonís dispoñendo calzadas diferenciadas mellorando a accesibilidade, a renovación do pavimento, a implementación dunha nova rede de pluviais, a renovación das redes de saneamento, o reforzo da iluminación pública da zona, a mellora da sinalización viaria, a instalación de novo mobiliario urbano e a plantación de arboredo en todos os puntos onde sexa posible.