O Concello da Coruña, a través dos Museos Científicos, convoca os premios Prismas Casa das Ciencias á Divulgación. O certame, que alcanza en 2026 a súa trixésimo novena convocatoria consecutiva, premiará cun Prisma de Bronce os mellores traballos en oito categorías: Vídeo, Novos medios, Artigo xornalístico, Radio, Proxecto singular, Libro editado e Proxecto de divulgación científica sobre a auga no medio urbano, categoría que se presentou por primeira vez na pasada edición e que está dirixida a proxectos que acheguen aos público aspectos científicos e tecnolóxicos sobre os sistemas de auga urbana e a necesidade de compatibilizar a dispoñibilidade de auga potable coa conservación da contorna. Ademais, concederase un Prisma Especial do Xurado a persoas ou institucións que se significaron pola súa especial contribución á divulgación científica.

"A divulgación científica é clave nas políticas do Goberno de Inés Rey, apostando por mellorar a nosa excelente rede de Museos Científicos con novos espazos como o MiniDomus e potenciando os premios Prismas con novas modalidades e unha maior implicación cidadá", indicou Gonzalo Castro, concelleiro de Cultura e Turismo.

Todas as modalidades, excepto a de Libro editado e a de Prisma Especial do Xurado, están dotadas cun premio de 4.000 euros. Para participar nesta XXXIX Convocatoria dos Prismas á Divulgación deben presentarse os traballos e candidaturas entre o 1 de maio e o 1 de xuño, cumprindo as condicións requiridas en cada unha das modalidades recollidas nas bases, e que se poden consultar nesta dirección: www.coruna.gal/mc2/gl/prismas

Os Prismas aos traballos que resulten gañadores entregaranse no transcurso dun acto que terá lugar na Coruña o sábado 14 de novembro de 2026.