O Concello dá continuidade ao plan de melloras previsto na Agra da Orzán, onde hoxe arrincaron os traballos para mellorar a accesibilidade da rúa Manuel Deschamps no treito entre Fanny Garrido e a rolda de Outeiro, unha intervención que forma parte dos compromisos adquiridos polo Goberno de Inés Rey coa veciñanza do barrio.

Manuel Deschamps é unha rúa configurada en dous treitos: o primeiro, entre a rolda de Outeiro e a rúa Fanny Garrido -que inclúe un pequeno carreiro sen saída, con acceso a bloques de residentes-, e o segundo, entre Fanny Garrido e Almirante Mourelle. "Neste último foi no que actuamos nestes últimos meses ao abeiro das melloras previstas entre Peruleiro e a rúa Barcelona, cofinanciadas con fondos europeos", precisou a concelleira de Infraestruturas e Mobilidade, Noemí Díaz.

Agora, e atendendo ás solicitudes das veciñas e veciños da zona, o Concello acometerá con fondos propios a mellora de accesibilidade no primeiro treito de Manuel Deschamps, co obxectivo de darlle xa unha uniformidade ao conxunto da rúa.

A grandes trazos, renovaranse os pavimentos da calzada e das beirarrúas, dándolle unha sintonía estética co tipo de baldosa que se habilitou entre Peruleiro e a rúa Barcelona. E, ademais, intervirase no carreiro lateral que hai no treito inicial da rúa. Ao ser un espazo eminentemente residencial, beirarrúa e calzada pasarán a estar configurados en forma de plataforma única, cun acceso para os vehículos que van aos garaxes. Ao longo do carreiro crearase, ademais, unha pequena área verde con arboredo e mobiliario urbano.

Como xa é habitual nestes casos, antes de que arrinquen os traballos de demolición, este luns instaláronse as casetas de traballo e os valados de obra, visibles xa na rúa.

Noemí Díaz incidiu en que, no contexto das obras, "o Concello manterá a interlocución constante coa veciñanza para manter a todas as persoas residentes informadas sobre o avance dos traballos e dos seus prazos".

As melloras na Agra, un compromiso do Goberno municipal

Coas novas actuacións en Manuel Deschamps, o Concello supera xa o millón de euros en investimentos en materia de infraestruturas no barrio da Agra, onde o Goberno de Inés Rey xa está a dar pasos fundamentais para concretar unha das demandas históricas do barrio: a apertura do parque do Observatorio.

Tal e como se informou a semana pasada no Pleno da Corporación municipal, o Concello acadou a semana pasada a concesión demanial dos terreos do parque por parte do Estado. Isto permitirá convertelo en zona verde e abrilo ao público neste mandato. Para facelo, será preciso derrubar antes os muros mentres que, en paralelo, se redacta o proxecto para executar o novo parque.