A alcaldesa, Inés Rey, participou esta mañá na praza de María Pita na lectura do manifesto polo Día Mundial do Párkinson. O acto, convocado pola Asociación Párkinson Galicia, reuniu a membros da corporación municipal, alcaldes, alcaldesas e concelleiros/as de diferentes concellos da área metropolitana, asociacións, empresas e particulares. Rey estivo acompañada por Mila Oreiro, directora da Asociación Párkinson Galicia; Nereida Canosa, concelleira de Benestar Social, Participación e Igualdade; e Ricardo González, membro da asociación, que leu o manifesto.

"Desde o Goberno municipal, a través da Concellaría de Benestar Social, traballamos activamente coas asociacións locais e provinciais para dar cobertura aos problemas do día a día", sinalou a alcaldesa, que reclamou unha maior implicación das administracións con competencias directas en saúde. Baixo o lema 'Non deas nada por sentado', o manifesto quere concienciar a cidadanía da importancia que ten coñecer e estar informado da enfermidade e das súas múltiples variantes. "Non podemos permitir como sociedade que se instaure no noso imaxinario colectivo que o párkinson é unha enfermidade que só lles afecta ás persoas maiores ou que o seu único síntoma son os tremores. Cómpre romper os estigmas asociados ao párkinson para dignificar as persoas que padecen esta enfermidade", sinalou Rey.